Heilindi markaðarins...?

eru dregin verulega í efa ... frelsi virðist vera í einkaeigu hinna ríku ... vissulega ekki hægt að tala um frelsi fyrir alla. 

spurning hvort markaðsvæðingin og hnattvæðingin hafi endilega skilað okkur betri heim eins og sumir halda fram ... eða hvort það hafi skapað nýtt kerfi valdaklíku sem byggir á að viðhalda "réttindum" auðmannsins frekar en á heilindum. stór hluti markaðarins vinnur eindregið gegn réttindum hins vinnandi manns sem skapar þó auðinn fyrir auðmanninn. tek fram að ég hef ekkert á móti því að fólk geti haft það mjög gott svo lengi sem það byggir ekki á launakúgun og misrétti annarra... sem það svo oft gerir í hinum kapítalíska heimi. varasamt með meiru.

"peculiar kind of freedom"  - skrítið frelsi sem últra kapítalisminn boðar

Bendi á góða heimildamynd frá BBC. 

The Trap - Adam Curtis - 1. hluti 

The Trap - 2. hluti 

The Trap - 3. hluti 

 

Ný stjórn er tilhlökkunarefni

Ég hlakka til að sjá nýjan stjórnarsáttmála

Ég hlakka til að sjá hversu langt XS ætlar að ganga í að vernda Fagra Ísland

Ég hlakka til að sjá hvort einhver árangur næst í jafnréttismálum á Íslandi næstu árin og hvort launamunur kynjanna verður í raun leiðréttur eitthvað að ráði

Ég hlakka til að sjá hvort búið verður betur að öldruðum og börnum í þessu samfélagi

Ég vona innilega að Ísland verði betra land til að búa í eftir nokkur ár... 

 

Minnihluti Íslendinga kaus D&B

Ef Geir H. Haarde er í raun ábyrgur maður og ábyrgur stjórnandi mun hann ekki halda áfram að starfa með Framsókn, svo mikið er víst. Ef hann er jafnframt svo ábyrgur að hann hlusti á tilkall þjóðarinnar til náttúruverndar mun hann heldur ekki halda áfram að starfa með Framsókn.   

Það sem mér finnst í raun hræðilegast er það að "meirihluti" XD og XB hélt velli, þrátt fyrir að vera aumur. Í báðum tilfellum ráða núna  þessir tveir flokkar bæði í borg og landi þrátt fyrir það að þeir hafa eingöngu um 48-49% fylgi. Finnst engum nema mér það réttmæt krafa í lýðræðislegu ríki að eingöngu megi mynda ríkisstjórn flokka sem hafa meirihluta fylgi í prósentum talið? Reyndar er kannski ekki ráðið ennþá hvort XD&XB verða áfram í hinni spilltu hjónasæng í stjórnarráðinu ... vonandi kemur annar flokkur í stað XB.

En ef þessi hrikalega stjórn ætlar sér að starfa áfram og XB jafnvel að taka upp á því sem Jón sagði með að setja fólk í ráðherrastóla og varamenn á þing í staðinn og tvöfalda þannig styrk sinn í stað þess að horfast í augu við að flokkurinn á bara að draga sig til hlés.

Ég spái því (án þess að hafa nokkra hugmynd um stjórnarmyndunarviðræður) að innan fárra daga verði mynduð ríkisstjórn D+V

Í dag kjósum við um einkaeignarrétt á vatni

Á liðnu þingi vöru lögð fram frumvörp um vatnsveitur sveitarfélaga. Borið hefur á því að stjórnarþingmenn skilji ekki sjálfir hvert inntak frumvarpanna er, og er þá ráð að upplýsa þá um það hér í stuttu máli.

 

Í sinni endanlegu mynd eru frumvörðin fyrstu skrefin í átt að einkavæðingu vatnsveitnanna í landinu. Í þeim er meðal annars opnað fyrir að sveitarfélög einkavæði vatnsveiturnar í landinu. Ef hægrimeirihlutinn í Reykjavík vill til dæmis einkavæða Gvendarbrunna er þeim frjálst að gera það eftir að lögin taka gildi í haust. Gott og vel, segja sumir, ef íbúar sveitarfélags vilja kjósa flokka sem ætla sér að einkavæða vatnið og gera það að söluvöru, þá ættu þeir að mega það. Því miður er málið ekki svo einfalt.

 

Einkavæðing vatnsveitna er tiltölulega einföld stjórnvaldsaðgerð – þær eru seldar hæstbjóðanda. Öðru máli gildir um að koma vatnsveitum aftur í almannaeign eftir að þær hafa verið einkavæddar. Reynslan sýnir að auðlindir sem hafa verið einkavæddar komast seint aftur í almannaeigu. Ein af ástæðunum er einfaldlega sú að það kostar að minnsta kosti jafnmikið að kaupa vatnsveiturnar aftur eins og þær voru seldar á. Einkafyrirtæki græða oft grimmt á að reka slíka þjónustu og eru því treg til að selja vatnsveiturnar aftur nema með miklum gróða. Með því að opna fyrir að sveitarfélögin geti einkavætt vatnsveiturnar er því í reynd verið að stuðla að því að vatnsveiturnar verði smátt og smátt komnar í eigu einkaaðila í mörgum sveitarfélögum.

 

Hitt er svo enn alvarlegra mál að ríkisstjórnin hefur samþykkt að vatnið sjálft verði gert að einkaeign í stað þess að vera sameign þjóðarinnar líkt og verið hefur hingað til. Einstaklingar hafa að vísu haft skýran afnotarétt af vatni um langt skeið, en nú hefur verið samþykkt að einstaklingar geti átt vatn og selt það líkt og um aðra markaðsvöru væri að ræða. Það gengur þvert á yfirlýsingu Sameinuðu þjóðanna þess efnis að drykkjarvatnið heyri til mannréttinda og að ekki skuli líta á það sem hefðbundna markaðsvöru. Á þessu byggist afstaða þeirra flokka sem hafna alfarið að opnað sé fyrir einkavæðingu vatnsveitnanna í landinu.

 

Í raun er bara eitt jákvætt við meðferð þessara mála í þinginu. Það er að lögin sem samþykkt voru taka ekki gildi fyrr en eftir þingkosningarnar sem nú nálgast óðfluga. Í dag verður kosið um það hvort farið verður í þá átt að þessi lög taki gildi um einkaeignarrétt á vatni, eða hvort við komum í veg fyrir það og tryggjum að vatn sé ávallt almannaeign þjóðarinnar.

Kíkið á kjosa.is

Nú styttist óðum í kosningar og lítur allt út fyrir að stjórnin falli - sem er náttúrulega mjög mikilvægt og eina leiðin til að hér verði einhverjar alvöru breytingar.

Kíkið á kjosa.is 

 

Hér er líka eitt mjög gott og fyndið

4 ástæður til að kjósa að skipta um ríkisstjórn

Lýðræði?
2 menn settu Íslendinga á lista þjóða sem studdu stríðið í Írak. 35 komu í veg fyrir þjóðaratkvæðagreiðslu um Kárahnjúkavirkjun.

Fjársterkir aðilar hafa eytt milljónatugum til að hlutast til um ákvarðanatöku sveitarfélaga í Hafnarfirði, Reyðarfirði og víðar.

Samfélag fyrir alla?
Einkavæðing heilbrigðisþjónustunnar er komin á dagskrá og unnið er að sölu Landsvirkjunar, og þar með orkuauðlinda þjóðarinnar.

1. nóvember á þessu ári taka gildi lög þar sem einkaeignaréttur á vatni er festur í sessi og vatn gert að markaðsvöru.

Græn framtíð?
Álver verða reist við Húsavík og í Helguvík og virkjanir í Þjórsá og Skjálfandafljóti.

Losun gróðurhúsalofttegunda hefur aukist hraðar hér en í nokkru öðru landi í Evrópu.

Kvenfrelsi?
Kynbundinn launamunur er 16% og hefur ekki minnkað um eitt einasta prósent.

23 af 63 þingmönnum eru konur, 4 af 12 ráðherrum.

Allt annað líf - Á laugardag eru 4 ástæður til að kjósa Vinstri græn:

Lýðræði!
Tryggjum að tiltekinn hluti þjóðarinnar geti krafist þjóðaratkvæðagreiðslu um umdeild mál.

Eflum grasrótarsamtök og tryggjum aðkomu almennings og frjálsra félagasamtaka að lýðræðislegri ákvarðanatöku.

Samfélag fyrir alla!
Burt með komugjöld og sjúklingaskatta.

Tryggjum almenningi lægra orkuverð og nýtum hlut ríkisins í Landsvirkjun í þágu skynsamlegrar orkunýtingar. Afturköllum lög um einkaeign á vatni og tryggjum að aðgangur að vatni verði áfram hluti af grunnréttindum okkar, líkt og andrúmsloftið.

Græn framtíð!
Stöðvum frekari stóriðjuframkvæmdir og ákveðum hvaða svæði við ætlum að vernda til framtíðar.

Stofnum loftslagsráð sem vinnur markvisst gegn losun gróðurhúsalofttegunda, m.a. með vistvænum samgöngum og fræðslu um umhverfismál.

Kvenfrelsi!
Afnemum launaleynd strax og eflum Jafnréttisstofu.

Vinnum að því að tryggja a.m.k. 40% hlut kvenna á þingi og í sveitarstjórnum, t.d. með því að hvetja til að fléttulistum verði beitt.

Hvar stendur þú? - Taktu könnunina

Nemar á Bifröst hafa sett upp gagnvirka stjórnmálakönnun ... sem að mínu mati er reyndar alls ekki tæmandi og hefði þurft að innihalda í það minnsta 10 grundvallarspurningar. Ekkert er minnst á aðgerðir í jafnréttismálum þarna t.d. Ekkert er minnst á aðgerðir í fjölskyldumálum.

En hvet ykkur til að taka þessa könnun

http://xhvad.bifrost.is/

 

Hér má síðan sjá smá færslu um Ögmund og bankana... hryllilega heimskulegur hræðsluáróður stjórnarflokkana bæði gagnvart bönkum, fjármagni og netlögreglu.

Ögmundur um bankana 

 

 

 

 

Tækifæri til nýsköpunar - grundvöllur að fjölbreyttu atvinnulífi!

Ég neita að trúa því að Íslendingar séu ekki að átta sig á því að það er núna, en ekki seinna sem við kjósum um verndun náttúru Íslands og um það hvort við viljum fjölbreytt atvinnulíf og stöðugleika í efnahagslífinu. Við þurfum að draga úr verðbólgu og þenslu til þess að heimilin í landinu verði ekki ofurseld verðtryggðum skuldum. Við VERÐUM að hverfa af braut stóriðjustefnunnar og búa í haginn fyrir lítil og meðalstór fyrirtæki svo þau geti vaxið. 

Það sem Íslendingar allir þurfa að spyrja sig núna er „Er það í alvöru svona sem við viljum hafa það?“ Viljum við fórna okkar dýrmætu náttúruperlum, jökulám og jarðfræðilega verðmætum svæðum á altari álfyrirtækjanna? Er það skynsamlegt út frá viðskiptalegu sjónarmiði að fórna 80-90% nýtanlegrar raforku í áliðnað? Getur það talist skynsamlegt að ýta undir svo einhæft atvinnulíf hér á landi? Geta álver virkilega verið lausn á atvinnuástandi hvers landshluta?  Hvers  vegna ættu að gilda önnur lögmál í Mosfellsbæ, Garðabæ og Seltjarnarnesi heldur en í Hafnarfirði??  Er ekki skynsamlegra að fara aðrar leiðir? Það má byggja upp öflugar heilsulindir víða um land, þjóðgarða af ýmsu tagi, t.d. eldfjallagarð, það má byggja upp vísindasetur, sem hvetja til alþjóðlegra rannsókna á dýrmætri jarðfræði Íslands, þekkingarsetur og söfn sem miðla menningarsögu okkar og þjóðlegum fróðleik. Það er kominn tími til að treysta á mannauðinn og hina miklu sköpunargleði okkar Íslendinga. Hættum að spyrja þessarar einfeldningslegu spurningar: „En hvað á eiginlega að koma í staðinn?“ Hver sá fyrir Marel, Össur og Bakkavör sem dæmi? Hverjum myndi detta í hug að spyrja hugvitsmann hvaða hugmynd hann ætlaði að fá næst? Hver myndi spyrja tónlistarmann hvaða lag hann ætlaði að semja næst? Haldiði að Mozart hafi getað svarað því?

 

 

 Tækifæri til nýsköpunar

 

1) Leggjum rækt við nýsköpun og fjölbreytni í atvinnulífinu og hugum sérstaklega að tækni- og þekkingargreinum um land allt. Hlúum sérstaklega að nýjum fyrirtækjum og litlum og meðalstórum fyrirtækjum.

2) Stofnum nýjan banka, Hugmyndabanka Íslands (www.hugmyndabanki.is), sem hjálpar okkur að virkja óþrjótandi auðlind — hugvit landsmanna. Löðum fram hugmyndir og gerum þær framkvæmanlegar og arðbærar. Hugmyndabankinn verður opinn öllum landsmönnum allan sólahringinn.

3) Greiðum götu atvinnugreina sem tengjast umhverfistækni, endurvinnslu og endurnýtingu. Horfum til þeirra möguleika og tækifæra sem fólgin eru í sjálfbærri orkustefnu.

4) Tryggjum að auðlindir sjávar verði raunveruleg sameign þjóðarinnar og að sjávarbyggðir fái réttlátan skerf veiðiheimilda. Hefjum heildarendurskoðun sjávarútvegsstefnunnar, setjum kvótaleigu skorður og auðveldum innlendri fiskvinnslu aðgang að hráefni.

5) Auðveldum sjávarútveginum að laga sig að markmiðum sjálfbærrar þróunar, ásamt því að treysta byggð og efla atvinnu í landinu öllu. Horfum til aukinnar nýsköpunar, fullvinnslu og verðmætaaukningar innanlands og bætum lífskjör þeirra sem við greinina starfa.

6) Stóreflum rannsóknir á lífríki sjávar og hafsbotninum í kringum landið og byggjum veiðistjórnun á umhverfissjónarmiðum. Aðkallandi er að gera úttekt á áhrifum jökulánna á lífríki sjávar.

7) Aukum vægi ferðaþjónustu og tryggjum henni sambærilega stöðu í stjórnskipun og lögum og öðrum atvinnugreinum. Eflum rannsóknir, þróun og nýsköpun í greininni, t.d. með áherslu á vetrarferðamennsku.

8) Tryggjum að landbúnaður og öll önnur landnýting þróist í sátt við umhverfið og á grundvelli viðhorfa um sjálfbæra þróun þannig að vistvænir búskaparhættir og góður aðbúnaður búfjár verði ávallt í öndvegi. Stuðlum að eflingu lífrænnar ræktunar, fjölbreyttrar heimaframleiðslu bænda og auknum möguleikum á sölu beint frá búi.

9) Auðveldum kynslóðaskipti í landbúnaði, m.a. með lánasjóði ungs fólks til jarðakaupa. Komum í veg fyrir að verslun með bújarðir raski byggð í sveitum landsins. Endurskoðum jarðalög og tryggjum að eignarhaldi á jörðum fylgi bæði réttindi og skyldur gagnvart umhverfi og samfélagi.

10) Setjum þak á hámarkshlut einstakra aðila af heildarframleiðslurétti eða -magni innan hverrar búgreinar. Í sauðfjárrækt og mjólkurframleiðslu verði miðað við 1% af heildargreiðslumarki. Jafnframt verði réttur til framleiðslustuðnings bundinn við búsetu á lögbýlum en ekki aðeins eignarhald.

11) Búum íslenskan landbúnað undir væntanlega alþjóðasamninga um verslun með landbúnaðarafurðir. Markmiðið verði að greinin fái hæfilega langan aðlögunartíma til að mæta samkeppni og sækja fram á erlendum mörkuðum, t.d. með því að breyta hluta núverandi framleiðslustyrkja í búsetutengdan stuðning.

12) Eflum listsköpun, handverk og smáiðnað. Gefum handverkshópum og einyrkjum aukin tækifæri til kraftmikillar sköpunar. Styrkjum sérstaklega greinar sem byggjast á lífrænum eða öðrum náttúrulegum auðlindum.

Geir hafnar Life Earth á Íslandi

Geir H Haarde, forsætisráðherra Íslands, fékk nýlega bréf þar sem honum og Íslandi var formlega boðið að Reykjavík yrði ein þeirra borga sem taka þátt í Live Earth tónleikaröðinni sem haldin verður 7. júlí í sumar. Geir hafnaði tilboðinu. Hinar borgirnar voru Rio, New York, London, Shangai, Sidney og Höfðaborg. Live Earth er meiriháttar tónleikaröð og áttu tónleikar að fara fram á Miklatúni eins og Sigurrósartónleikarnir síðasta sumar og hefði getað orðið frábær uppákoma.

Meiriháttar erlendir listamenn voru væntanlegir auk þess sem þetta var tækifæri fyrir íslenskt tónlistarfólk. En Geir hafnaði tilboðinu. Nú er leitað leiða til að fjármagna tónleikana en ...

Geir - hann er leiðtoginn sem hafnaði heiminum fyrir álbræðslur og Alcoa.

Kíkið á grein Andra Snæs um ár hinna glötuðu tækifæra 

Kíkið á nýútkominn disk: Hálendi Íslands e. Jóhann G. Jóhannsson, kíkið á frétt hér  

http://www.landvernd.is/myndir/Halendi_Islands_JohannG.mp3.

 

 

Live Earth staðreyndir

 

Markmið:

Að skapa alheimshreyfingu í gegnum 24 stunda útsendingu með áherslu á

umhverfisvernd og hrinda af stað breytingum hjá neytendum, fyrirtækjum og

á pólitískum vettvangi.

Dagsetning: 07/07/07

Staðsetningar:  Jóhannesarborg – Afríka, London – Evrópa, Sydney – Ástralía, New York – Norður Ameríka, Shanghai – Asía, Rio de Janeiro – Suður Ameríka, Tokyo – Asía, Reykjavík – Evrópa, Aðrir möguleikar: Mumbai – Indland

Þáttakendur: Tónlistarfólk: 150 + á heimsmælikvarða.

Kynnar: Rithöfundar, íþróttafólk, skemmtikraftar, stjórnmálamenn, forstjórar og vísindamenn.

Skilaboð: Verðlaunahöfundar og leikstjórar búa til stuttmyndir og skilaboð sem send verða út á öllum miðlum og á sviðum meðan tónleikarnir og útsendingin fer fram.

Útbreiðsla á heimsvísu: Áætlað er að 2 milljarðar manna muni ná 24 stunda lifandi útsendingunni í gegnum sjónvarp, internet, útvarp, farsíma og í kvikmyndahúsum.

2 milljónir áhorfenda viðstaddir tónleikana út um allan heim.

 

Áhugaverðir punktar: Staðsetningar: Hver tónleikastaður verður hannaður og reistur af teymi umhverfisverkfræðinga og hönnuða sem hafa sérþekkingu á sjálfbærri þróun og vistvernd. Teymið mun leita leiða til að umgjörð hvers tónleikastaðar endurspegli helstu áherslumál í umhverfisvernd og orkumálum hvers svæðis.

Styrktaraðilar: Fyrirtæki sem hafa tileinkað sér hina grænu Live Earth stefnu verða fengin um borð sem opinberir styrktaraðilar á alheimsvísu með áherslu á vörumerkjatengingu og aðgerðir.

Þátttakendur: Áhorfendur á vettvangi og í gegnum miðla verða fræddir um það hvernig þeir geta stoppað neikvæð áhrif sín á umhverfið.

 
LIVE EARTH

Opinber heimasíða: www.liveearth.org  opnar í janúar 2007

  

XD neitar að horfast í augu við raunveruleikann

Jú, þeir ætla að einkavæða Landsvirkjun! þeir vilja líka einkavæða öll orkufyrirtæki landsins og neita þar með að horfast í augu við þá reynslu sem það hefur gefið öðrum löndum. Slíkar breytingar á þeirri grunnþjónustu í vestrænum ríkjum að útvega rafmagn og hita í hús almennings á kostnaðarverði hefur alltaf leitt til hærra orkuverðs - svo einfalt er það. Vinstri flokkarnir - eða að ég held allir flokkar nema XD&XB telja að slíkt eigi að vera í rekstri og á ábyrgð ríkis og sveitarfélaga til að tryggja almenningi sem lægst orkuverð og á að vera hluti af þeirri grunnþjónustu sem samfélagið rekur í sameiningu. 

 

Sem kunnugt er hafa fyrstu skrefin í átt til einkavæðingar orkugeirans þegar verið stigin. Og afleiðingarnar hafa þegar komið fram í stórhækkuðu raforkuverði. Fyrirmyndin er sótt til Evrópu en sem kunnugt er voru settar reglur og gefnar út tilskipanir á tíunda áratug síðustu aldar um að búið skyldi í haginn fyrir þessa þróun. Nú er að koma í ljós að hún hefur ekki gefið góða raun.

 

"Fíaskó" fyrir heimili og atvinnulíf

Í tímaritinu Verktækni sem samtök verkfræðinga gefa út er að finna afar athyglisverða umfjöllun um danska skýrslu sem segir markaðsvæðingu raforkugeirans hafa verið "fíaskó" fyrir notendur. Verð hafi hækkað um þriðjung, fyrirtækjum á markaði hafi fækkað með tilheyrandi fákeppni. Í tímariti verkfræðinga er rakið hvernig skýrsluhöfundarnir dönsku sýna fram á að raforkuverð hafi hækkað, miðað við fast verðlag, um 25% árin 2000-2005 til iðnfyrirtækja og um 33% til almennra raforkukaupenda. "Fullyrðingar um ávinning af frjálsum raforkumarkaði standist einfaldlega ekki. Þeir leggja til að Danir beiti sér fyrir því ... að ESB semji ný raforkulög frá grunni." Í greininni í Verktækni kemur einnig fram að samkeppnisyfirvöld innan Evrópusambandsins taki undir þessa gagnrýni.
Þetta kemur heim og saman við aðrar rannsóknarskýrslur sem birtar hafa verið. Sjálfstæðisflokknum íslenska virðist hins vegar ekki koma það við þótt reynslan af þessum kerfisbreytingum sé slæm. Í ljósi þess leyfi ég mér að beina þeirri spurningu til kjósenda hvort þeim finnist rétt að kjósa til valda stjórnmálaflokk sem boðar stefnu sem allt bendir til að sé neytendum – jafnt fyrirtækjum sem öllum almenningi – óhagstæð. Finnst fólki það vera eftirsóknarverð framtíðarsýn að auðhringir á borð við Alcan og Alcoa eignist Landsvirkjun, Hitaveitu Suðurnesja og önnur orkufyrirtæki?

 

En stefna XD er skýr, þeir vilja einkavæða og tryggja það að fjármagnseigendur þessa lands fái að hafa puttana í rekstri orkufyrirtækja og geti orðið ríkari fyrir vikið á meðan við hin greiðum brúsann í hærra orkuverði. Þetta settu þeir inn í ályktanir landsfundarins.

Hér segir að tryggja eigi Finni Ingólfs hluta af kökunni, en hvað sá maður er eitthvað gulltryggður hjá þessari ríkisstjórn - hvað ætli hann hafi gert til að vinna sér inn alla þessa góðvild ríkisstjórnarinnar? 

Landsvirkjun sögð á sölulista stjórnvalda

 

 

Kosningabarátta keyrð á hræðsluáróðri

Svo virðist sem stjórnarflokkarnir ætli sér að keyra sína kosningabaráttu að mestu á hræðsluáróðri. Mér þykir það ekki góð pólitík og vona innilega að þjóðin láti ekki hræða sig til að kjósa þessa flokka af því hún þori ekki að skoða hvernig ásýnd stjórnmála í landinu yrði með nýrri stjórn. Oft hræðist fólk breytingar, alveg sama hversu smáar eða stórar þær eru. Þegar maður breytir til veit maður jú ekki hvað býður manns, en oftast eru breytingarnar til góða vegna þess að þær knýja fram jákvæða orku, breyttar áherslur osfr. Ég vona innilega að þjóðin þori að breyta til í vor og kjósi að fella þessa ríkisstjórn.

Mér þykir alveg merkilegt að fylgjast með umræðuþáttum í sjónvarpinu þegar stjórnarliðum er stillt upp á móti hinum frambjóðendunum og ef maður fylgist vel með þá kemst maður að því að þeir fá helmingi lengri tíma fyrir sitt mál en allir hinir. Svo virðist sem þáttarstjórnendur átti sig ekki á því að þeir gefa hvorri hlið um sig jafn langan tíma, en öðru megin eru tveir um þann tíma og hinum megin eru 4.

Mér finnst dálítið fyndið hvernig sumir netverjar og stjórnarliðar keyra á þeim hræðsluáróðri að fjármagnið fari allt úr landi ef VG kemst að í ríkisstjórn og leggur fram sína stefnu í nýsköpunarmálum sem að mínu mati falla mjög vel reyndar að hugmyndafræði XD. Að efla nýsköpun og lítil sprotafyrirtæki er það sem þarf á Íslandi í dag til að þekking okkar og menntun nýtist til framtíðar. En fyndið að heyra hræðsluslagorðið "allt fjármagnið fer úr landi!"   - en ef fjármagnseigendur sem einungis hafa tekjur af fjármagni þurfa að reikna sér laun og greiða útsvar og skatt eins og launþegar af þeim launum - er þá ekki bara tryggt að þeir sitji við sama borð og aðrir launþegar og reglurnar í raun samhæfðar því sem gerist og gengur erlendis? Ef fjármagnstekjuskatturinn er hækkaður upp í 14% af einungis þeim sem mestar hafa tekjurnar af honum, en afnuminn fyrir um 90% þjóðarinnar sem á smásparnað, eða í kringum milljón inn á reikning (sem er í stefnuskrá VG) - er þá einhver hætta á að fjármagnið fari úr landi? Og hvert á það þá að fara þegar öll lönd innan OECD eru með hærri fjármagnstekjuskatt en 14%??? HVERT? 

Síðan er það annað með fyrirtækjaskatt - það verður bara að koma fram sem víðast að VG hefur engin áform um að hækka fyrirtækjaskatt, punktur.  

 

 

Ábyrg efnahagsstjórn

1) Endurheimtum efnahagslegan stöðugleika með því að hverfa frá núverandi stóriðjustefnu og sláum þannig á þensluna.

2) Efnum til víðtæks samráðs við atvinnurekendur og launþega, náum verðbólgu niður fyrir viðmiðunarmörk, vöxtum niður á eðlilegt stig og drögum úr viðskiptahalla.

3) Náum jafnvægi á fasteignamarkaði með auknu húsnæðisframboði, félagslegum íbúðalánum og hærri húsaleigubótum.

4) Ráðumst í nauðsynlegar framkvæmdir á sviði samgöngumála og tryggjum hagstæð skilyrði til nýsköpunar í atvinnulífi.

5) Stefnum að því að heildarskatttekjur ríkis og sveitarfélaga hækki ekki sem hlutfall af landsframleiðslu miðað við meðaltal áranna 2005–2007.

6) Bætum afkomu sveitarfélaganna og tryggjum þeim tekjuauka upp á 5 milljarða króna til að sinna þeim brýnu verkefnum sem flutt hafa verið þangað.

7) Hækkum skattleysismörk í áföngum og dreifum skattbyrðinni með sanngjarnari hætti þannig að lægstu launum og tryggingagreiðslum verði hlíft við sköttum og skattbyrði lægri launa létt.

8) Breytum fjármagnstekjuskatti þannig að upp verði tekið frítekjumark fyrir allt að 120 þúsund króna fjármagnstekjur en greidd 14% af tekjum þar fyrir ofan.

9) Þeim sem eingöngu telja fram umtalsverðar fjármagnstekjur en engar launatekjur verði gert að reikna sér endurgjald þannig að þeir greiði sanngjarnan skatt til samfélagsins.

10) Tökum upp sérstakan skattaafslátt fyrir sprotafyrirtæki og ný fyrirtæki í uppbyggingu.

11) Afnemum stimpilgjöld eftir því sem aðstæður á lánamarkaði og fasteignamarkaði bjóða.

12) Aukum gagnsæi í launa- og skattamálum.