Hafa jólasveinarnir samvisku?

Síðan sonur minn fór að verða var við heimsóknir jólasveinanna og fá gjafir í skóinn frá þeim hef ég mikið velt fyrir mér hvernig eiginlega standi á því að þeim detti í hug að leyfa sér að mismuna börnum eins mikið og raun ber vitni með þessar skógjafir. Ekki bar kannski mjög mikið á því í leikskólanum að verið væri að bera saman og velta sér upp úr hversu rosalegar gjafir sumir krakkarnir fengu, en nú þegar sonurinn er byrjaður í skóla og orðinn þroskaðri er hann aðeins að byrja að velta því fyrir sér.

Þannig er nú mál með vexti að fyrstur kom hann Stekkjastaur, og viti menn, haldiði að einn skólabróðirinn hafi ekki verið búinn að búa til óskalista og fékk af honum gjöf í skóinn fyrstu nóttina. Sonur minn sagðist ætla að prófa það sama og sjá hvort jóli myndi svara honum eins vel. Skynsama og blanka móðirin (ég) ákvað að reyna að draga pínu úr væntingum sonar síns og sagði honum því að maður gæti nú ekki búist við því að skrifa óskalista með risadóti og fá það bara allt, heldur mætti maður eiga von á að jólasveinninn kæmi yfirleitt með lítið smádót í skóinn og svo kannski eina stærri á aðfangadag þegar jólin eru komin.

Rökfastur drengurinn sagðist nú ætla samt að prófa þetta með því að skrifa jóla bréf um einn hlut og skilja eftir í skónum. Hann sagðist nú líka hafa heimildir fyrir því að sumir fengju alveg risadót í skóinn því annar skólabróðir í bekknum hafði fengið eitthvað risastórt (og sennilega mjög dýrt) leikfang í skóinn, sem af lýsingum að dæma hefur tekið undir sig hálfa gluggakistuna! Sá hinn sami gisti víst hjá mjög efnuðum föður sínum þá nótt og því velti ég fyrir mér hvort þangað komi kannski aðrir jólasveinar en í mitt hús, eða þá að skógjafirnar séu kannski tekjutengdar og ríkisstjórnin sé kannski bara jólasveinninn??? Mér datt það svona aðallega í hug af því hún er bara svo vön því að mismuna og henni þykir heldur ekki mikið að marka þær tölur sem koma fram í rannsóknum um fátækt barna hér á landi. 

Að mínu mati skiptir minna máli hvort skýrslan um fátæktina gefi rétta mynd af stöðunni árið 2006 eða hvort þau séu fleiri eða færri núna... að mínu mati ættu ekki að vera nein fátæk börn á eins ríku landi og Íslandi. Þau væru sennilega heldur ekki til í þessu landi ef önnur ríkisstjórn væri í stjórnarráðinu og hefði haft vit á því að hækka hreinlega lögleg lágmarkslaun.

Hvað varðar jólasveinana þá óska ég þess að þeir sýni hófsemi og skynsemi í gjafavali sínu til barnanna í landinu og hafi samvisku til að vera meðvitaðir um það að börnin bera saman bækur sínar í skólanum um hvað þau fengu í skóinn.

En eitt er víst að jólasveinninn er til! Sonurinn var farinn að velta því fyrir sér (eftir að hann byrjaði í skólanum) hvort það væri mögulega afgreiðslufólkið í leikfangabúðum sem færðu börnum gjafir í skóinn ... en núna er hann alveg viss um að jólasveinarnir eru til, því í morgun fékk hann svarbréf frá jólasveininum sem sagðist ætla að biðja hjálpar-álfana sína að athuga hvort til væri pókemon kúla sem er hægt að kasta og út koma Ash og Píkatsjú!

Að lokum vil ég gleðjast yfir því að það eru í það minnsta sumir jólasveinar með samvisku 

Athugasemdir

[Guðfríður Lilja (IP-tala skráð) 13.12.2006 kl. 13:30]

Góður jólapistill Andrea! Ekki vanþörf á að hvetja alla jólasveina landsins að hafa í huga að börn bera saman bækur sínar og leggja saman tvo og tvo... og fá út hvað? Jú, að meira að segja reiknikúnstir jólanna, sem eiga að vera kærleikshátíð allra (og fagna fæðingu þess sem faðmaði fátæk börn alveg sérstaklega), hygla sumum börnum miklu meir en öðrum. En Andrea Ólafs (fjórtándi jólasveinninn?!) er allavega jólasveinn með sanngjarnt hjarta - húrra fyrir því! Nú þarf bara fleiri slíka í byltinguna - stráum jafnrétti í jólaskóinn! - Lilja

[Ólafur fannberg, 14.12.2006 kl. 02:57]

kvitt

[Inga Björk (IP-tala skráð) 14.12.2006 kl. 17:37]

Þetta er ótrúlegt að lesa, ég vissi ekki að krakkar fengju risagjafir í skóinn! Ekki var það þannig þegar ég var krakki og mínir strákar fá nú  "bara" litla jólakalla, einn stykki nammi, mandarínu osfrv. osfrv. Þeir eru auðvitað ungir en ég ætla ekki að breyta til og gefa eitthvað stórt í skóinn, kemur ekki til greina. Þrátt fyrir að þeir hafi engan til að bera saman við í leikskóla/skóla (í framtíðinni) þar sem við erum einu Íslendingarnir í bænum

Jólaveinakveðja, IBH