Ræðan sem ég hélt á Austurvelli í dag

Íslenska efnahagsundrið? Jahá einmitt ... ef það hljómar of gott til að vera satt, þá er sennilega eitthvað bogið við það ... og það endaði líka með íslensku efnahagsHRUNI. Við erum mitt í hruninu og það er hvergi nærri búið – uppbyggingin og endurreisnin er ekki hafin enn.

En hvernig gerðist þetta eiginlega?
Jú, ÞEIR fengu bankana á silfurfati, banka sem þjóðin átti, ÞEIR léku sér aðeins með tilraunir til að græða og græddu helling, svo mikinn helling að það var “undravert” alveg hreint. ÞEIR fengu algert frelsi án nokkurrar ábyrgðar – EN VIÐ áttum að bera ábyrgðina.

Og ég segi ÞEIR vegna þess að það var stjórnlaus og gráðugur karlpeningurinn sem kom okkur í þessar aðstæður og ég tek undir þau frægu orð “HELVÍTIS FOKKING FOKK”!!!

Við erum í vondum málum. En hvernig var það eiginlega, var ekki búið að vara okkur við, sögðu Danir okkur ekki árið 2006 að eitthvað væri nú bogið við starfsemi bankanna hér á landi? Og voru ekki fleiri sem lögðu til nokkur varnaðarorð? En hvað gerðum við? Við skutum skollaeyrum við og vildum ekki heyra, allavega mörg hver. Og hver var ástæðan – jú við vorum svo klár og miklir snillingar í útrásinni að við vorum ósnertanleg. Ég hlustaði á Danina og hafði mínar efasemdir, en það er líka af því ég dreg í efa hið stórkapítalíska kerfi sem gjörsamlega mergsýgur og arðrænir almenning í þágu hinnar ríku elítu sem virðist eiga til í sér endalausa, hamslausa græðgi.

Um leið og ég segi þetta veit ég að mörgum hryllir við og er það ekki típískt fyrir íslendinga að segja mig öfunda þá um leið og ég gagnrýni þá og þeirra hugmyndafræði???
NEI, ég öfunda þá sko ekki – ég kæri mig ekki um að verða rík á svo dýrkeyptan kostnað annarra.

En ég held nú samt áfram og vil tala til skynsemisradda innra með ykkur sem getur sagt okkur sannleikann.
Við vissum þetta alveg, við bara neituðum að horfast í augu við að það var eitthvað bogið við þetta allt saman.
En við vissum það innst inni.

Ef við spáum aðeins í það saman, þá er enginn í heiminum sem getur orðið svona ótrúlega ríkur og skilað svona rosalegum hagnaði ár eftir ár nema þá að vera að arðræna einhvern annan í þágu sjálfs síns. Það er ekki hægt að “búa til” svona mikla peninga nema þá með því að okra á næsta manni, stunda óheiðarleg viðskipti eða hreinlega bara prenta peninga. Ég veit að það er ekki vinsælt að segja þetta, en í mínum huga er þetta nú bara staðreynd.

JÁ ÞEIR settu okkur á hausinn sem þjóð og ÞEIR eiga að bera ábyrgðina. Af hverju er ekki búið að frysta eigur þeirra ennþá og af hverju er ekki hægt að hneppa þá í gæsluvarðhald vegna gruns um brot rétt eins og búðarþjófa og aðra glæpamenn? Er það af því þeir eru í jakkafötum?

VIÐ eigum ekki að taka á okkur ICESAVE. Þetta er fáránlega lélegur samningur, 5,5% vextir á meðan stýrivextir í Evrópu eru undir 2% - hvað á það að þýða?
Það á bara að semja betur, segja bretum og hollendingum að við getum ekki staðið undir þessu og það á að bjóða þeim eignasafnið lélega sem þeir vilja ekki, og láta þá sjálfa eltast við persónulegar eigur bankamannanna og innistæður þeirra í skattaskjólum.
Gefum bretunum bara veiðileyfi á víkingana!

En nóg um það, ég kom hér til að tala um heimilin í landinu. Hvernig stendur eiginlega á þessari tregðu ríkisstjórnarinnar að bregðast við svindlinu?
Af hverju eiga heimilin í landinu að gjalda fyrir óráðrsíuna í bankagúrúunum? Hvaða réttlæti er í því?
Það er EKKERT réttlæti í því, þannig er það. Ef við gætum fengið réttlæti, þá værum við tilbúin til þess að taka þátt í endurreisninni í samvinnu við stjórnvöld og atvinnurekendur. En NEI, stjórnvöld neita okkur um réttlætið, þau neita að leiðrétta lánin okkar í samræmi við eitthvað sem gæti talist eðlilegt. Þeim finnst í lagi að við tökum á okkur verðbólguskot og gengishrun, launalækkanir og vinnumissi - og ætlast til að við steinhöldum kjafti og borgum bara “af þvi við getum alveg staðið í skilum”!!! Getum við það?

Jú vissulega er það rétt hjá þeim ljúfa velviljandi manni honum Steingrími J. og heilögu Jóhönnu að mörg okkar geta alveg staðið í skilum og greitt af okkar blessuðu lánum sem við horfum á höfuðstólshækkun á mánuð eftir mánuð og hneppa okkur í þrældóm til yfir 100 ára! En er það réttlætanlegt? Er það sanngjarnt gagnvart okkur lántakendum að þetta sé ekki leiðrétt? NEI, ÓNEI það er hvorki réttlætanlegt né sanngjarnt!

Það þekkist að mínu viti hvergi annars staðar í vestrænum ríkjum að fólki sé boðið upp á lán sem bæði eru verðtryggð og með vöxtum. Að þau séu tengd neysluvísitölu sem hefur undantekningarlaust hækkað, ár eftir ár, síðan að krónan var sett á flot og verðbólgumarkmið voru tekin upp. Það er borin von að lánin munu nokkurn tíma verða greidd upp að fullu á einni mannsævi. Er ekki eitthvað bogið við þetta???

Ég sá um daginn að Egill Helgason hafði birt á blogginu sínu útreikninga kunningja míns þar sem hann sýnir fram á að sá sem tók 11 milljóna króna lán árið 2001 til 40 ára miðað við 5,65% verðbólgu, sem er meðaltalsverðbólga síðast liðinna 10 ára, kemur til með að greiða 199 milljónir til baka fyrir þetta lán.
Sá sem tók 18 milljóna króna lán 2009 til 40 ára kemur til með að greiða 325 milljónir miðað við sömu verðbólgu! Þetta búum við við og þetta finnst ráðamönnum eðlilegt eða hvað?

NEI segi ég, þetta er nútímaþrældómur og ekkert annað. Þetta er grátlegt og broslegt í sömu andrá. Ég gat ekki annað en hlegið við þegar ég sá auglýsinguna frá BYR um daginn þar sem þeir hvöttu landsmenn til að greiða meira inn á höfuðstól lána sinna til að stytta lánstímann um nokkur ár. Það broslega við auglýsinguna var súluritið sem sýndi annars vegar súlu upp í 104 ár og hina upp í 95,5 ár!!! HAHAHA – þeir hvöttu til þess að við greiddum 10þús krónum meira á mánuði inn á höfuðstólinn til að minnka láns-tímann úr 104 árum (miðað við 11 milljóna kr. lán) og í 95,5 ár!
ÞAÐ ER FJÁRHAGSLEG HEILSA! :)
Eru þeir þá líka að miða við að líkamleg heilsa okkar verði svo góð og líftími svo hár að við munum lifa til að sjá lánið okkar uppgreitt???!!!
Elsti maður heims, Tomoji Tanabe, dó um daginn 113 ára gamall. Hann þakkaði langlífi sitt þeirri staðreynd að daglega drakk hann glas af mjólk. Þá vitum við hvernig við getum lifað til að sjá lánin okkar uppgreidd.

Í raun og veru getur þetta varla talist annað en skrípaleikur eða harmleikur - nema hvort tveggja sé.

EN ég verð samt að gagnrýna aðeins og koma með ábendingar til almennings til varnaðar svo að fasteignamarkaðurinn fari aldrei í svo háar hæðir eins og hann gerði síðast liðin ár. Þar berum við vissulega líka ábyrgð því við getum haft áhrif á markaðsverð fasteigna. Það gerum við með því að samþykkja ekki að kaupa þær á yfirverði, samþykkja ekki að leyfa fasteignasölum og verktökum að maka krókinn uppúr öllu valdi og hafa okkur að fíflum. Við eigum að sporna við því með því að halda að okkur höndunum og kaupa ekki fasteignir á slíkum tímum.
Þannig getum við mögulega haldið betra jafnvægi á markaðnum.

Sjálf er ég ekki í vondum málum, en mér finnst samt hrikalega óréttlátt að hafa tekið lán fyrir 6 árum síðan upp á 8 milljónir og vera búin að borga samviskusamlega á hverjum mánuði, samtals rúmar 3 milljónir, á meðan ég horfi á lánið mitt hækka á hverjum mánuði – síðast þegar ég kíkti var það komið yfir 11 milljónir og hefur semsagt ekkert lækkað höfuðstólinn með þessum afborgunum mínum, heldur þvert á móti hækkar hann og hækkar endalaust.
---
Hún Jóhanna okkar kæra forsætisfrú talaði ötullega gegn verðtryggingunni fyrir nokkrum árum þegar hún var í stjórnarandstöðu. Það gerði Steingrímur líka. En þegar þau eru komin í stjórn og ekkert er eðlilegt við ástandið í þjóðfélaginu þá gera þau nákvæmlega ekkert í því að afnema verðtryggingu á lánum, né heldur eru þau tilbúin í almennar leiðréttingar á höfuðstólshækkun lána okkar vegna verðbólguskots sem er svo fram úr öllu hófi að það getur ekki talist annað en réttlætismál að leiðrétta það.

En NEHEI, þau þrjóskast við og draga dár að þeim sem tala í þá veru að leiðrétta þassa höfuðstólshækkun! Þau tala um að þau vildu hitta þann galdramann sem gæti gert slíkt án þess að það kostaði peninga. Þau gætu kannski fundið galdramanninn sem hafði það “hugrekki” að ætla að afnema verðtrygginguna með öllu á sínum tíma og byrjaði á að afnema hana af launum en náði ekki lengra en það :) ... því sá galdramaður er nefnilega til.

Báðir ríkisstjórnarflokkarnir eru að starfa gegn sínu æðsta valdi, landsfundum flokkanna, á meðan þau koma ekki með almenna leiðréttingu á höfuðstóli lána. Landsfundir beggja flokka samþykktu ályktanir í þá átt að þeim bæri að finna leiðir til þess að leiðrétta höfuðstól lána með tilliti til óeðlilegra aðstæðna út af verðbólguskotinu.
Hér ríkja óeðlilega aðstæður, það varð alger forsendubrestur gagnvart lántakendum þegar gengið hrundi og verðbólgan fór upp úr öllu valdi.
En þau virðast ekki ná því að það er enginn að biðja ríkið um að gefa sér peninga og slík leiðrétting kæmi ekki til með að kosta ríkissjóð fjárútlát. Þetta væri hins vegar viðurkenning á því hversu óeðlilegt ástand ríkir og þetta væri viðurkenning á því að þessar tekjur af höfuðstólshækkun væru ekki réttlætanlegar inn í ríkissjóð eða bankana. Það væri því eðlilegra að tala um tekjumissi í framtíðinni heldur en kostnað ríkissjóðs núna.

Við erum ekki að biðja um að láta fella niður eða afskrifa skuldir sem við stofnuðum til vísvitandi til að kaupa okkur eigin heimili. Við erum ekki að biðja um fjárútlát af hendi ríkisins til þessa. Við erum að biðja um einfalda leiðréttingu á bókhaldi íbúðalánasjóðs og bankanna, þannig að höfuðstóll lána okkar verði færður niður í þá skuld sem hann stóð í fyrir hrunið. Og þá erum við samt að tala um skuld sem hafði þá þegar hækkað verulega mikið árin áður vegna þenslunnar sem hefur hækkað vísitöluna og lánin.

Sjálf myndi ég vilja ganga alla leið og afnema með öllu verðtryggingu því það er ekkert eðlilegt að verðtryggja lán eða peninga yfir höfuð. Það er nánast hvergi gert og gengur ekki upp. Það er ekkert eðlilegt við það. Við ættum frekar að fara fram á stöðuga efnahagsstjórn og lítinn en stöðugan hagvöxt – það hefur ekki gengið upp í tíð fyrri ríkisstjórna ... en núna eru aðrir teknir við og það eina sem við getum gert er að vona að þeim takist betur til.

Eins þurfum við að krefjast þess að fá betri lánakjör, eins og þau gerast á hinum Norðurlöndunum. Við þurfum óverðtryggð lán sem samt eru á lágum föstum vöxtum, undir 3%.

Ég gekk til liðs við Hagsmunasamtök heimilanna sem mér finnst hafa unnið ákaflega ötult og gott starf í þágu heimilanna. Ég hvet ykkur öll til að skrá ykkur í samtökin á heimilin.is svo við getum saman myndað stóran þrýstihóp á stjórnvöld.
Næstkomandi þriðjudag standa samtökin fyrir fundi Iðnó kl. 20. Einnig verða haldir fundir á Akureyri, Selfossi, Reykjnesbæ og Flúðum. Samtökin munu hvetja félagsmenn og landsmenn að taka höndum saman og fara í greiðsluverkfall.

Að lokum vil ég segja að ef þjóðinni á að takast að komast í gegnum þessa erfiðleika saman tel ég algerlega nauðsynlegt að vinna þetta með þjóðarsátt. Þar þarf allt Alþingi að hafa aðkomu, ekki eingöngu ríkisstjórnin. Eins þurfa almenningur og atvinnurekendur að hafa málsvara. Það ætti að finna leið sem allir geta sæst á til að leysa þennan vanda sem blasir við okkur. Og það ætti að láta ICESAVE í þjóðaratkvæðagreiðslu.

Brilljant uppátæki! :)

Þessi er flottur - slíkrar þjónustu er sárlega þörf á ... ekki síst í landi þar sem það viðgengst nú í stórum stíl að afskrifa skuldir auðmanna og bjóða þeim að kaupa aftur gömlu eigur sínar á lægra verði!!! Hvernig í ósköpunum getur þetta átt rétt á sér? Sérstaklega í ljósi þess að enn hefur ekki farið fram rannsókn á málinu til hlítar. Hvernig stendur á því að auðjöfrinum sem liggur undir grun um stórfellt svindl var settur í fangelsi á meðan á rannsókn stendur og lögð var fram ákæra á hendur honum, en ekkert slíkt hefur gerst hér?

Hvernig væri að ríkið felldi nú niður húsnæðislánin okkar og byði okkur svo að við mættum samt kaupa húsin okkar aftur á brunaútsölu??? Ég væri alveg til í svoleiðis díl!

Tætir sundur skuldir heimila

Ekki er öll hagfræðin eins

Það er spurning af hverju er svona gífurlegt misræmi í því hvernig brugðist er við kreppunni ... en reyndar eru flest vestræn lönd frekar að lækka vexti en hækka þá. En seðlabankinn hér á landi lætur það eins og vind og eyrun þjóta og hlustar eingöngu á úrelt og löngum þekkt ráð Alþjóðagjaldeyrissjóðsins sem ekki hafa virkað gegn kreppu hingað til.

Ætli það geti verið að það séu bara vit-lausir menn sem fara með ráðin í seðlabanka Íslands? Manni er bara spurn.

Vextir 0-0,25% í Bandaríkjunum

Byrjar vel hjá Obama

Mér lýst vel á Obama, hann virðist taka umhverfismálin alvarlega og þar að auki hefur hann núna ráðið til sín bæði Nóbelsverðlaunahafa ásamt 3 konum til að leiða USA inn á þessa nýju braut. Vona bara að þessir fræðingar og forystusauðir átti sig á því að orka er ekki endilega "græn" þótt hún sé skárri en margt annað. Orka sem fengin er úr jarðvarma er hvorki laus við mengun né heldur er hún endilega "endurnýjanleg" þegar gengið er of hart á hana eins og Landvernd hefur margoft reynt að benda á. Eins eru rannsóknir sem sýna okkur það að stór uppistöðulón geta bæði valdið mengun og haft afleiðingar á lífríki sjávar sem skilar sér í minnkun fiskistofna. Eins höfum við núna séð að við framleiðslu ethanóls, sem á að verða umverfisvænna eldsneyti, þarf gífurlegt magn og pláss og hefur gert það að verkum að matvæli hafa hækkað mikið í kjölfarið. Alla möguleika þarf að skoða gaumgæfilega til að komast að niðurstöðu um hver er besti kosturinn, því þeir eru mjög misgóðir.

En þetta eru skref fram á við í samanburði við Bush stjórnina og miklu máli skiptir á næstu árum hvernig þessum málum verður háttað í USA - en þeir þurfa svolítið mikið að líta í eigin barm áður en þeir beina spjótum annað. Skoða eigin neyslumynstur, reglugerðir varðandi mengun og fara að endurvinna í miklu meira mæli.

Ný forysta í loftslagsmálum

Vísindi ástarinnar

Á þessum síðustu og verstu tímum í skammdeginu og kreppunni sem enn á eftir að skella á okkur af fullum krafti þá langar mig að deila með ykkur smávegis um vísindi ástarinnar - þurfum við ekki að hugsa líka um eitthvað annað en kreppuna og svartnættið framundan?

http://helenfisher.typepad.com/

http://www.ted.com/index.php/talks/view/id/16

Flott framtak hjá ÍTR-Hinu Húsinu

Rosalega finnst mér flott framtak hjá Hinu Húsinu að hafa svona lýðræðis og fjármálafræðslu fyrir ungt fólk. Ég hvet unga fólkið því til að nýta sér þessa fríu þjónustu til að fræðast og hitta annað ungt fólk í sömu hugleiðingum :) 

Neyðarstjórn kvenna gefur út fyrstu Kvennastjórnartíðindin

Langar að vekja athygli á nýjum félagasamtökum sem upp hafa sprottið úr kreppuástandinu. Konur hafa tekið sig saman og myndað Neyðarstjórn kvenna sem ætlar að fjalla um málefni líðandi stundar og jafnvel koma með kvenlegan vinkil og ráð í ástandinu.

Hér er fyrsta tölublað Kvennastjórnartíðinda sem gefið er út af fjölmiðlahóp Neyðarstjórnarinnar.
http://blogg.visir.is/kvennastjornartidindi/files/2008/11/kvennastj_les.pdf

Ég hvet síðan alla til að mæta á Austurvöll í dag til að finna stemningu sameiningar Alþýðunnar.
Á Austurvelli verður einnig gamli Volvoinn minn til sýnis í nýju gervi eftir að listamaðurinn umdeildi Þórarinn Jónsson lét hendur standa fram úr ermum :)

Leynikröfur Alþjóðagjaldeyrissjóðsins? Látum ekki blekkjast!

Ég vil vekja athygli ykkar á eftirfarandi pósti sem ég fékk í dag. Vakin er athygli á spillingu innan Alþjóðagjaldeyrissjóðsins - þeir ásælast auðlindir annarra þjóða með leyniákvæðum í gegnum hina svokölluðu "neyðaraðstoð" sem löndin eiga erfitt með að afþakka. Um þessi leyniákvæði fáum við líklegast ekkert að vita fyrr en eftir áratugi þegar upp kemst og við höfum misst frá okkur landið. Joseph Stiglitz nóbelsverðlaunahafi var rekinn frá World bank fyrir að vekja athygli á "hinum raunverulega árangri" sem sjóðurinn hefur náð. 

Íslendingar vaknið - Spilling innan IMF

Hér að neðan má finna nokkrar áhugaverðar en jafnframt óþægilegarstaðreyndir um Alþjóðagjaldeyrissjóðinn sem ríkisstjórn Íslands og Seðlabankinn leitar nú á náðir hjá.Það er almennur misskilningur að IMF (Aljóða gjaldeyrissjóðurinn) ségóðgerðastofnun. Hinar svokölluðu "hjálparaðgerðir" IMF hafa á síðustu árumverið harðlega gagnrýndar um allan heim.

Joseph Stiglitz, nóbelsverðlaunahafi í hagfræði, starfaði sem framkvæmdastjóri IMF (Alþjóðabankans á þetta að vera - world bank) á árunum 1997-2000 en var svo rekinn úr starfi fyrir að tjá sig opinberlega um hinn "raunverulega árangur" IMF. Hann benti á þá staðreynd að flest ríki sem þiggja aðstoð IMF enda í mun verri stöðu en áður. Efnahagskerfin hrynja algjörlega, ríkisstjórnir splundrast ogríkisvaldið minnkar og oftar en ekki endar allt í hörðum átökum ogglundroða. Fyrir það að benda á þessa alkunnu staðreynd var hann rekinn.Það er staðreynd að ríki sem eru í efnahagslegum vandræðum þola sjaldan þauskilyrði sem IMF setur fyrir lánveitingum sínum. Hækkun skatta og harðurniðurskurður í mennta- og heilbrigðiskerfum fer illa með fólk í viðkomandilöndum. Kröfur um opnun markaða eyðilegga alla innlenda framleiðslu oglandbúnað. Strangar kröfur um einkavæðingu veita svo náðarhöggið því helstunauðsynjar og þjónusta hækka upp úr öllu valdi.

Suður Ameríka er gott dæmi um þá hörmungarslóð sem IMF hefur skilið eftirsig. Mörg lönd þar hafa misst öll auðæfi sín í hendur erlendra einkaðila,aðallega bandarískra og breskra stórfyrirtækja sem kúga þegna landana meðgríðarlegum hækkunum á t.d. gasi, olíu og jafnvel drykkjarvatni. Þar á meðaleru lönd eins og Argentína, Bólivía, Brazilía, Chile, Paraguay og ElSalvador. Sömu sögu er að segja í Indónesíu og nokkrum Afríkuríkjum.Eftir slíkar aðfarir er skiljanlegt að almenningur rísi upp með hörðummótmælum og uppþotum gegn ríkisstjórnum landana, sem frá upphafi voru ívonlausri stöðu. Efnahagurinn hrynur aftur og landið þarf að afsala sér ennfrekari réttindum og auðæfum til IMF.

Argentína er eitt ljótasta dæmið um þessa meðferð IMF. Þar varð á endanum efnahagslegt stórslys eftir aðkomu IMF og gjörsamlega allar auðlindir landsins voru seldar erlendum stórfyrirtækjum eins og British Petrolium ogEnron. Jafnvel vatnsveitukerfin voru einkavædd og stór hluti höfuðborgarinnar Buenos Aires er án drykkjarvatns. Ekki nóg með að vatn sénú dýrt, heldur er bara ekki hægt að skrúfa frá krananum.

Árið 2001 voru svo opinberuð mjög óþægileg skjöl fyrir IMF. Ónefndur aðillilak viðkvæmum skjölum í hinn margverðlaunaða blaðamann og rithöfund GregPalast, sem birti þau opinberlega í sjónvarpsviðtali og síðan á heimsíðusinni *www.gregpalast.com* .Þar kom fram að ofan á þær opinberu kröfur sem IMF hafði sett Argentínu ogfleiri ríkjum settu þeir fram óopinberar og leynilegar kröfur sem alþjóðasamfélagið fékk ekki að vita um. Að meðaltali voru þetta yfir hundrað leynikröfur á hvert ríki. Leiðtogum ríkjanna var stillt þannig upp við veggað þeir urðu að láta undan og samþykkja allar kröfurnar. Þar á meðal voru kröfur um það hvaða erlendu risafyrirtæki fengju auðlindir þjóðanna svívirðilega langt undir raunvirði. Skjölin voru undirrituð af JimWolfensen, þáverandi framkvæmdarstjóra IMF. Í fyrstu neitaði bankinn tilvist skjalana en dró það til baka eftir að Greg Palast birti þær á síðunni sinni.Bankinn varð þá að viðurkenna tilvist skjalana en ákvað að tjá sig ekkifrekar um málið opinberlega.IMF er að því er virðist spillt stofnun að einhverju eða jafnvel öllu leyti.Sú hugsun er í raun ekki svo langsótt þegar litið er til þeirrar staðreyndarað IMF er að 51% hlut í eigu United States Treasury.

Allir ofangreindir hlutir eru því miður staðreyndir.Efasemdamönnum er velkomið að gera örlitla upplýsingaöflun á netinu, ekki þarf að leita lengra en *www.wikipedia.com* En hefur Ísland eitthvað að óttast vegna væntanlegs láns frá IMF? Ríkisstjórn Íslands hefur fullyrt það að kröfur IMF séu "ásættanlegar" og að íslenskt efnahagslíf sé sniðið að þörfum og kröfum IMF og þurfi ekkert aðóttast. Það er von allra Íslendinga að svo sé en við skulum nú samt velta nokkrum hlutum fyrir okkur áður en við tökum þau orð góð og gild.

Ef litið er blákalt á stöðuna þá er Ísland komið í svo slæma stöðu að ekkivirðist nein önnur útgönguleið en að leita á náðir IMF. En svo mikið er vístað þegar aðeins ein möguleg leið er sjáanleg úr mikilli krísu þá aðsjálfsögðu virðist sú leið "ásættanleg" hver svo sem hún er.Nú þegar IMF er kominn með hönd sína á íslensku reiðtygin, byrjar íslenskiseðlabankinn að hækka stýrivexi upp í 18% sem mun án nokkurs efa veitamörgum fjölskyldum og fyrirtækjum náðarhöggið á þessum erfiðu tímum.Fjármálaspekingum um allan heim þykir þessi leikur Seðlabankans vægast sagtfurðulegur þegar aðeins eru 10 dagar frá því stýrivextir voru lækkaðir niðurí 12%. Seðlabankastjórnin virðist ekki vita í hvorn fótinn hún á að stíga.Einnig er erfitt að líta fram hjá því að hækkun stýrivaxta hér á landi er algjörlega í andstæðu við þá verulegu lækkun stýrivaxta sem önnur lönd hafa ákveðið að nota gegn heimskreppunni.

En hvað er hægt að gera?Er hægt að gera eitthvað meira en að vona það besta?Auðvitað verðum við Íslendingar að trúa því og treysta að ráðamennþjóðarinnar og Seðlabankinn séu að gera sitt besta á þessu erfiðu tímum. Envið megum ekki gleyma því að þessir sömu aðillar sem nú fara ofan í saumanaá íslenska efnahagshruninu og eru að setja saman björgunaraðgerðir fyrirþjóðina, eru þeir sömu og bera hvað stærsta ábyrgð á allri vitleysunni.Nú verðum að standa upp og krefjast þess að þeir sem eigi hlut að máli axliábyrgð. Krefjumst þess að gamla hugsunarhættinum verði skipt út fyrir nýjarhugsjónir, og fyrst og fremst verðum við að krefjast þess að allar upplýsingar um aðdraganda og eftirmála íslensku kreppunar verði dregnar framí sviðsljósið.Við eigum ekki að sætta okkur við það að þeir aðilar sem eru ábyrgir fyrirhruninu sitji nú við samningaborðið við spillta stofnun fyrir luktum dyrumog neiti að tjá sig um ákvæði samninga.Afhverju taka samningaviðræður við IMF svo langan tíma og afhverju ríkir svomikil leynd yfir þeim? Gæti það mögulega verið vegna þess að ráðþrotaríkisstjórn okkar eigi mjög erfitt með að kyngja þeim leynisamningum ogvaldbeitingu sem IMF beitir nú með miklum þunga?Við verðum að gera ráðamönnum þjóðarinnar ljóst að okkur er ekki sama um þáálitshnekki sem þjóðin hefur orðið fyrir og að aldrei muni það viðgangast aðauðæfi og stolt þjóðarinnar verði hrifsuð burt.

Íslendingar stöndum ekki aðgerðalausir né lítum niður á þá sem mótmæla.Tölum ekki gegn þeim sem hylla raunverulegt lýðræði.Okkur Íslendingum ber skylda að standa saman og láta í okkur heyra.

Mætum næstu laugardaga niður á Austurvöll kl 15:00 og látum rödd fólksinsóma til yfirvalda.

...höfundur ofangreinds texta er óflokksbundinn og stoltur Íslendingur.Arnar Fells Gunnarsson

 

Færeyingar - vinir í raun

Mér var bent á þessa síðu þar sem íslendingar geta komið þökkum á framfæri til Færeyinga fyrir að sýna okkur þann velvilja að lána okkur á þessum erfiðu tímum. Ég vona umfram allt að Ísland þurfi ekki aðstoð Alþjóða-gjaldeyrissjóðsins með hrikalegum afleiðingum sem það getur haft. Ráð þeirra um hækkun stýrivaxta hefur ekki borið tilætlaðan árangur í öðrum löndum sem það hefur verið reynt til að komast útúr kreppu og því finnst manni undarlegt að reyna aftur gamalt ráð sem hefur brugðist annars staðar.

En þökk sé Færeyingum og Pólverjum og öðrum þeim sem ætla að lána okkur fé til að rétta stöðuna hér.

 

 

 

 

 http://faroe.auglysing.is/# 

 

Klár í kreppu? - fjármálanámskeið fyrir ungt fólk

Ég leyfi mér að setja hér inn tilkynningu frá ÍTR um fjármálanámskeið fyrir ungt fólk. Ég hef mikið heyrt talað um það á liðnum árum hve mikilvægt slíkt er og ætti í raun að vera hluti af menntaskólanámi. Eins er mikið talað um að ástandið hjá ungu fólki sé afskaplega slæmt varðandi yfirdrætti og há lán sem það sér ekki fram úr að geta staðið undir. Ég hvet því ungt fólk á aldrinum 16-25 ára til að sækja þetta ókeypis námskeið hjá Hinu Húsinu, glott framtak hjá þeim :)

 

KLÁR Í KREPPU?

Hitt Húsið, Neytendasamtökin og Reykjavíkurborg standa fyrir ókeypis fjármálafræðslu fyrir ungt fólk, 16-25 ára,í Hinu Húsinu Pósthússtræti.

Námskeiðið er ókeypis!
Að námskeiði loknu eiga þátttakendur að vera færir um að stjórna eigin fjármálum á ábyrgan hátt.
Allir þátttakendur fá í hendur USB lykil sem hefur að geyma persónulegt bókhaldsforrit og fjármálafræðslu á mannamáli.



Námskeiðið er fyrir þá sem :
• Vilja öðlast skilning og stjórn á eigin fjármálum.
• Vilja vera vel upplýstir og meðvitaðir neytendur.
• Vilja losna við yfirdrátt og neyslulán.
• Vilja öðlast skilning á öllum helstu hugtökum fjármálaheimsins.
• Vilja læra að gera fjárhagsáætlun og að reikna út launin sín.
• Vilja eignast USB lykil sem hefur að geyma persónulegt
bókhaldsforrit og almenna fjármálafræðslu á mannamáli.

Vikulegir fundir í einn mánuð:
Þriðjudaginn 11.nóvember kl. 17-19
Þriðjudaginn 18. nóvember kl. 17-19
Þriðjudaginn 25. nóvember kl. 17-19
Þriðjudaginn 2. desember kl. 17-19

Ekki missa af þessu einstaka tækifæri !

Skráðu þig á slóðinni: www.hitthusid.is eða í síma: 695-5103
Skráðu þig sem fyrst þar sem aðgangsfjöldi er takmarkaður

Baráttukveðjur

Jón Heiðar Gunnarsson
Verkefnastjóri í Ráðgjafadeild
Framkvæmdarstjóri Jafningjafræðslu
Hitt Húsið
Pósthússtræti 3-5, 101 Reykjavík
Sími: 695-5103, 411 5522