Leita í fréttum mbl.is

Verðbréfadrengurinn - skemmtilegt lag í kreppunni

 

hrikalega fyndið lag - flott hjá stelpunni - mun raunsærra en fólk átti kannski von á á þeim tíma...

 

 

bendi líka á grein um kreppuna á eggin.is í dag sem einnig birtist í Morgunblaðinu

http://www.eggin.is/index.php?option=com_content&task=view&id=928&Itemid=9

 


Trúðirðu í alvörunni að þetta héldi endalaust áfram?

Hélstu fyrir alvöru að góðærið tæki engan enda? Að heimurinn gæti þanist út án þess að nokkurn tíma kæmi samdráttur? Að kassinn sem þú býrð í myndi endalaust hækka í verði þannig að þú gætir velt þér upp úr hversu mikils virði hann væri og hvað þú værir búinn að "græða" á honum? Þvílík vitleysa sem búin er að eiga sér stað í síðustu árum er ekki í takt við raunveruleikann og hefði aldrei getað haldið áfram - það vissu alltaf þeir sem voru með báðar fætur á jörðinni. Þeir héldu líka áfram að haga sér með skynsamlegum hætti án þess að veðsetja allar eigur sínar í botn til að kaupa sér fleiri fína bíla og skulda meira. Kaupæðið og brjálæðið í útrásinni hér á landi og víða hefur með engum hætti verið eðlilegt og við þurfum öll að skilja það einfalda lögmál að það sem fer upp mun alltaf koma niður aftur. Það er einfalt lögmál og ekki erfitt að skilja ef maður hefur augun einfaldlega opin, en blindast ekki í brjálæðinu.

Það er nefnilega ekki þannig að hlutir hafi endalausa þenslumöguleika - þannig er ekkert í eðli sínu - allir hlutir og öll fyrirbæri hafa sín takmörk og það er okkur hollt að hugsa ávallt um það. Meira að segja er talið að alheimurinn hegði sér þannig að hann "andi" eða þenjist út og dragist svo saman.

Það versta er að þeir sem alla tíð hafa hagað sér skynsamlega og tóku á engan hátt þátt í þessari kaupæðisklikkun síðustu ára þurfa líka að súpa seyðið af því hvernig hinir höguðu sér, því lánin okkar eru öll verðtryggð (eða allflest), því er nú ver og miður - þannig að öll súpum við seyðið af biluðum hæðum verðbólgunnar.

Húsnæðisbólan og hið himinháa verð í þeim geiranum hefur alls ekki gert flestum okkar gott. Það er nefnilega ekkert gott að heimilin okkar hækki í verði þegar við ætlum ekkert að selja þau, heldur bara búa í þeim. Það eina sem það hefur í för með sér eru hærri fasteignagjöld og minni vaxtabætur. Eins hefur það í för með sér fjölda heimilisgjaldþrota núna á næstu mánuðum og árum í þeim tilfellum sem fólk var að kaupa eigur á þessu himinháa verði og spenna fjárhaginn framúr öllum skynsemismörkum. Finnst ykkur í alvöru eðlilegt að hús, kassi úr steinsteypu, kosti okkur margfalt á við raun-byggingarverð? Það finnst mér ekki.

Ég las í gær grein í Guardian þar sem Charlie Brooker kemst skemmtilega að orði um það hversu mikið bull það er sem fólk er búið að láta segja sér síðustu árin og hversu mikið drasl það er búið að vera að láta selja sér.
http://www.guardian.co.uk/commentisfree/2008/oct/13/features-comment

Kannski er ágætt að það komi smá raunveruleikatékk eftir allt ruglið - kannski verður það til þess að fólk fer í alvöru að hugsa um það sem mestu máli skiptir í lífinu og hefur kannski verið vanrækt síðustu árin eða áratugina. Kannski fer fólk í alvöru að spá í það sem getur veitt þeim raunverulega djúpstæða ánægju í lífinu og felst ekki í veraldlegum eigum. Ég er allavega bjartsýn á að þessi kreppa verði til þess að góðar breytingar geti átt sér stað og fólk endurmeti sín gildi og lífsstíl.


Kominn tími til að stöðva mannréttindabrot BNA í Guantánamo

Flott framalag hjá VG á þingi áður en fólkið fer í sumarfrí. Vonandi hefur ríkisstjórnin kjark til að koma þessum skilaboðum áleiðis til BNA-stjórnar. Hrikalegt hvernig þeir hafa komist upp með það árum saman að brjóta á fólki án dóms og laga. Og það jafnvel saklausu fólki eins og mér og þér.

Bendi á smá samantekt um Guantánamo á Egginni um daginn.

Aðeins um Guantánamo 

 


mbl.is Utanríkismálanefnd afgreiðir ályktun gegn Guantánamo
Tilkynna um óviðeigandi tengingu við frétt

Rakaskemmdir - alvarleg áhrif á heilsufar fólks

Ekki er ég hissa á að blessaðir læknarnir finni fyrir einkennum á heilsu sinni þegar rakaskemmdir eru í húsnæðinu sem þeir vinna. Síþreyta, astmi, húðexem, þrálátar (krónískar) eyrnabólgur og kvef, einbeitingaskortur, minnistap, þunglyndi, þrálátir höfuðverkir, verkir í liðum (gigt), hjartsláttartruflanir, sjóntruflanir (lesblinda?) og fleira og fleira.

Myglusveppir myndast í húsum ef raki nær að myndast í lengri tíma en 2 daga. Myglusveppir gefa frá sér bráðeitrað efni sem fólk andar að sér og getur orðið mjög veikt af. Þessi eitur kallast mycotoxin, eða bara myglusveppaeitur. Þótt margir læknar þekki það ekki og þvertaki fyrir það að svo geti verið (aðallega vegna vanþekkingu - ekki innifalið í læknanáminu), þá hafa ýmsar rannsóknir verið gerðar sem benda óyggjandi til þess að þegar raki myndast í húsum getur það haft mjög alvarlegar afleiðingar á heilsu fólks.

Einnig eru til rannsóknir sem sýna fram á að sveppaeitrun af þessu tagi getur leitt dýr til dauða. Hægt er að finna fræðigreinar og rannsóknir þessu tengt víða á internetinu ef fólk vill kynna sér málið. Góð leitarorð eru mycotoxins, mold, mould, health effects eða eitthvað slíkt.

Vonandi verður þetta til þess að læknarnir opna augun fyrir þessum heilsufarsvanda og kynna sér málið gaumgæfilega.

Sjálf er ég að vinna verkefni, BA ritgerð, þar sem ég fjalla um þessar ofannefndu rannsóknir og vonast til að það geti orðið til að fræða bæði almenning og heilbrigðisstarfsfólk um málið og þá vonandi orðið til að gerðar verði fleiri rannsóknir á Íslandi varðandi þessa heilsufarsvá.

Hér má lesa um hvernig áhrif slíkt getur haft á okkur mannfólkið:

Hús og heilsa

Náttúrufræðistofnun Íslands - um sveppi

Mold-help

Mold-survivor

Mold-survivor - um einkenni og sjúkdóma

Chronic neurotoxins

Þeir sem þekkja fleiri en eitt þrálátt einkenni á heilsu sinni sem nefnt er að ofan eða inn á þessum síðum ættu að kynna sér mjög vel hvað hægt er að gera til að ná aftur bættri heilsu. Gangi ykkur vel :)

Þeir sem eru að lesa þetta og gruna að myglusveppir séu til staðar á heimilinu eða eru með veika fjölskyldumeðlimi og vilja láta athuga málið hvort um myglusveppi er að ræða, mættu gjarnan hafa samband við mig ef þeir hafa áhuga á að vera með í lítilli rannsókn sem ég er með í framkvæmd. Skrifið mér þá endilega á ajo@hi.is


mbl.is Fleiri læknar með einkenni
Tilkynna um óviðeigandi tengingu við frétt

Forsætisráðherra Spánar yfirlýstur feministi - ófeiminn og veit hvað orðið þýðir!

Langaði að deila með ykkur grein sem ég las rétt í þessu um spænska þingið. Spánverjar virðast vera á góðri leið með að fara langt fram úr íslendingum hvað varðar jafnrétti kynjanna. Í það minnsta er forsætisráðherrann þeirra, hann Zapatero, tilbúinn til að lýsa því yfir opinberlega að hann sé feministi og er ekki hræddur við að setja lög um kynjakvóta.

Á Spáni eru konur í meirihluta ráðherra ríkisstjórnarinnar, eða 8 af 15 (skv.BBC og Wikipediu (Council of Spanish Ministers)) og nú eru komin lög um að konur verða að vera minnst 40% frambjóðenda í kosningum þar ílandi. Zapatero hefur einnig lýst því yfir að hann muni fara norsku leiðina varðandi fyrirtæki, þeas. setja líka lög varðandi kynjahlutföllin í stjórnum fyrirtæka.

Í greininni kemur einnig fram hversu íhaldsöm karlremba Berlusconi er - en hann lýsti því yfir nýlega að þetta væri nú allt "helst til mikið bleikt" að hans mati þarna á Spáni. Í greininni verður hann náttúrulega að athlægi í samanburði við Zapatero - en þó má vera að einhverjar karlrembur séu nú sammála honum.

Allavega, langaði að benda ykkur á þessa áhugaverðu grein á BBC:
http://news.bbc.co.uk/2/hi/europe/7375230.stm


Við þurfum eitthvað að fara að spýta í lófana á klakanum ef
við ætlum að hafa roð í hann Zapatero og hin Norðurlöndin :)


Við hvað ætli Geir og XD séu svona hræddir?

 

 

PS... Svona til öryggis fyrir þá sem enn ekki vita hvað orðið feministi þýðir þá er skilgreiningin á þessa leið: "sá (af hvoru kyni sem er) sem gerir sér grein fyrir að jafnrétti kynjanna hefur ekki verið náð og vill gera eitthvað í því"  Wink


Stríð fyrir hverja? Einkavætt Íraksstríð kostar 3 trilljónir dollara...

Stríðið í Írak hefur staðið yfir í 5 ár ... 5 ár! Það er langur tími. Og hvað hefur "unnist"? Bush segir að bæði USA og Írak séu öruggari - þvílíka ruglið! Hvaða rugl er þetta eiginlega sem látið er viðgangast í þessum heimi okkar? USA einkavæddi stríðið og stórfyrirtæki eru að hafa mikið uppúr því að reka einkavædda herþjónustu. Hverjum getur dottið slíkt í hug nema últra frjálshyggjumönnum!? Klikkun og ekkert annað. Hvernig stendur á því að þjóðir heims þora aldrei að rísa upp gegn USA og standa saman um að stoppa þá af í kjaftæðinu? Við vitum að sjálfsögðu öll, eða allflest í heiminum, að Bush er náttúrulega albilaður greyið og öll munum við anda léttar þegar hann fer frá í haust. En það er gífurlegt hvað maðurinn og hans stjórn hefur náð að skaða heiminn á meðan hann hefur verið við völd. Þvílíkar lygar og blekkingar, allt í þágu peninga ... og hver græðir? 

Í nýlega útgefinni bók sinni færir Nóbelsverðlauna-hagfræðingurinn Joseph Stiglitz rök fyrir því að stríðið gegn Írak hafi kostað Bandaríkin 3 trilljónir bandaríkjadala. Sjá nánar hér 

 

Rétt til að minna fólk á afleiðingar þessa stríðs langar mig að benda á heimildamyndir í því sambandi.

Um einkavæðingu stríðsins: Iraq for sale: The war profiteers

http://freedocumentaries.org/film.php?id=130

Um blekkingarnar: Uncovered: The War on Iraq

http://freedocumentaries.org/film.php?id=46

Um mannréttindabrotin í Guantanamo: The Road to Guantanamo

http://freedocumentaries.org/film.php?id=82

 

Og hví ekki að sjá aðeins um Bush kallinn og hans fjölskyldu? Aðeins um lygarnar í kringum stríðið í Írak og hvernig almenningur var blekktur... aðeins um blekkingar og kosningasvindl í Ameríkunni... aðeins um tengsl Bush við Bin Laden fjölskylduna, ekki veitir af smá innsýn í veröld blekkinganna:

 http://freedocumentaries.org/index.php?ct=1

 

Bið ykkur síðan að minnast allra þeirra sem hafa látið lífið og þjáðst vegna þessa græðgis-stríðs. 

 


Lögbrot án afleiðinga

“Mýtan um að jafnrétti sé náð kemur í veg fyrir frekari framfarir”, segir Ingunn Yssen formaður miðstöðvar jafnréttismála í Noregi. Ég er henni sammála og tel að við þurfum að varast að falla í þá gryfju að trúa þeirri mýtu. Tölurnar sýna okkur svart á hvítu að jafnrétti hefur ekki verið náð, þótt við stöndum mörgum öðrum framar.

 

Þrátt fyrir mikla sigra síðustu aldar og miklar framfarir á sviði jafnréttismála, sem þakka má ötulum kvenréttindakonum á árum áður, er enn langt í land að fullkomnara jafnréttissamfélagi. Vissulega er Ísland framarlega á þessu sviði miðað við mörg önnur lönd – en maður á aldrei að miða sig við þá sem standa sig illa, heldur þá sem standa sig allra best og eigin væntingar. Ég ætla því hvorki að hafa fleiri orð um þann árangur sem náðst hefur né hvort ekki þurfi einnig að berjast fyrir réttindum kvenna í öðrum löndum. Ég ætla að beina augum að því hvers vegna ekki hefur náðst meiri árangur á vinnumarkaðinum en raun ber vitni á síðustu áratugum á Íslandi.

 

Á fyrstu kvennaráðstefnu Sameinuðu þjóðanna, árið 1975, voru samþykkt tilmæli um að þörf væri á lagasetningu varðandi jafnréttismál víða um heim. Hér á landi hafa síðan verið sett lög um jafnrétti karla og kvenna. Lagasetning ein og sér tryggir þó ekki að þeim sé framfylgt. Enn er langt í land varðandi stöðu kvenna á vinnumarkaði. Konur njóta ekki jafnréttis hvað varðar laun, hlutfall í stjórnum eða sem stjórnendur, hvorki í einkageiranum né hjá hinu opinbera. Fyrir sumum virðist einkageirinn eiga að njóta einhvers konar friðhelgi fyrir lögum í landinu að þessu leyti og eru margir tregir við að fylgja þeim eftir.

 

Nýlega kom í ljós að launamunur kynjanna hefur lítið minnkað í rúman áratug. Þrátt fyrir þetta draga sumir enn í efa niðurstöður Hagstofunnar - sem margoft hafa komið fram í rannsóknum og úttektum - og nefna dæmi um konur sem eru með hærri laun en karlar á vinnumarkaði. Hlutfall hálaunaðra kvenna er ekki hátt, ekki nægilega hátt til að jafna muninn fyrir allar hinar sem er mismunað í störfum sínum. Ein af þeim hugmyndum sem mikið var rædd, bæði meðal stjórnmálamanna og almennings, var að frekar ætti að umbuna fyrirtækjum fyrir að fara eftir jafnréttislögunum heldur en að hafa viðurlög við brotum á þeim. Við þessa nálgun vil ég setja ákaflega stórt spurningarmerki. Ef þetta á að verða almenn nálgun varðandi eftirfylgni jafnréttislaga þá tel ég að við verðum að bera það saman við eftirfylgni annarra laga. Hvernig er hægt að láta sér detta slíkt í hug? Vissulega má umbuna fyrirtækjum sem eru til fyrirmyndar, en jafnframt verður að hafa viðurlög við lagabrotum ef ætlast er til að þau séu virt og enn harðari viðurlög við síendurteknum brotum. 

 

Væri þá ekki alveg eins rétt að verðlauna fyrirtæki fyrir að fara að öðrum lögum um rekstur fyrirtækja, eins og t.d. lögum um skattskil og endurskoðun? Flest fyrirtæki sjá sóma sinn í því að fara eftir þeim vegna þess að það eru einfaldlega of alvarlegar afleiðingar af því að gera það ekki. Þetta má yfirfæra yfir á önnur atriði sem lúta að réttindum verkafólks og lífeyrissjóða (allavega hér á landi). Hvað með fólk almennt? Myndi það fara eftir lögum ef það vissi að það hefði engar afleiðingar að brjóta þau? Er ástæða til að verðlauna eða umbuna fólk sérstaklega fyrir að virða lög sem Alþingi hefur sett? Venjan er sú að hafa refsingu við brotum og sú nálgun að ætla eingöngu að umbuna fyrir eftirfylgni sýnir að mínu mati þá afstöðu að í raun séu lögin ekki sérstaklega mikilvæg.

 

Í Noregi var farin sú leið að setja lög um 40% lágmarkshlutfall kvenna í stjórnum fyrirtækja. Hlutfallið getur þó verið breytilegt eftir stærð stjórnarinnar. Ég efast ekki um að hugsunin hafi verið sú að bæði samfélagið í heild og fyrirtækin sjálf myndu bera hag af því. Norðmenn veittu fyrirtækjunum fimm ára frest til að undirbúa sig og aðlagast þessu breytta lagaumhverfi, en gáfu jafnframt út þá aðvörun að þeim yrði lokað sem ekki væru búin að leiðrétta stöðuna í janúar 2008. Kapitalistarnir vöruðu þá við því að efnahagurinn myndi hrynja, fyrirtækin myndu flýja land og allt væri unnið fyrir gýg – rétt eins og þeir gera margir hér á landi. Þetta reyndist hins vegar ástæðulaus ótti, norskt efnahagslíf stendur sterkum fótum, fjárfestar og fyrirtæki eru enn í landinu og það sem meira er, konurnar sem voru skipaðar í stjórnir eru með meiri menntun en karlarnir. Um 38% stjórnarmeðlima eru konur samanborið við 15,5% á þeim tíma sem lögin voru kynnt. Konur eru hins vegar ekki nema 15% af forstjórum og 4% af stjórnarformönnum þar í landi. Kapitalistarnir ættu kannski frekar að spyrja sig að því hvort þeir vilji ekki hafa ennþá fleiri konur sem stjórnarformenn og forstjóra vegna þess að komið hefur í ljós að fyrirtæki sem konur stjórna skila meiri hagnaði.

 

Ástæðan fyrir því að ég nefni norsku lögin er ekki sú að mæla sérstaklega með þessum ákveðnu lögum, heldur sú að benda á nauðsyn þess að fylgja eftir lögum á ákveðinn hátt. Ég er að benda á það augljósa, sem þó fyrir sumum virðist ekki svo augljóst, að fyrirtæki bregðast ekki við jafnréttislögunum eins og þau ættu að gera og eins og lögin gera ráð fyrir, fyrr en það bitnar mjög alvarlega á þeim að virða gildi jafnréttis að vettugi.

  

Frekari fróðleikur:

Fyrirtæki sem konur stjórna skila meiri hagnaði

Er ein kona betri en engin? - um hlutföll kvenna í stjórnum

Vanmat, launaleynd og aukinn ójöfnuður – könnun félagsmálaráðuneytisins

Launamunur kynjanna nánast sá sami og fyrir 12 árum

Launamunur kynjanna mestur á Íslandi af Norðurlöndunum

Óútskýrður launamunur kynjanna 10-12%

Kynbundinn launamunur 23,2%

Konur hafa 66% af launum karla fyrir fullt starf

Kynbundinn launamunur þingmanna 4-6%

Launajafnrétti eftir 581 ár?

 

Jafnréttislög – til hvers? ræða

Efnahagsleg völd kvenna - skýrsla

Konur og karlar – skýrsla hagstofunnar

Lög um jafna stöðu og jafnan rétt kvenna og karla (nr. 96/2000.)

Skýrsla félagsm.ráðherra um stöðu frkv.áætl. ríkisstj. að ná fram jafnrétti kynjanna

 

Norway – Women in private sector

Norwegian women break down boardroom barriers

Norway law – women on boards

 

 

 Til hamingju með alþjóðlegan baráttudag kvenna

  8. mars

 

Hér má sjá dagskrá dagsins


Hagsmunaárekstrar?

Maður veltir því aðeins fyrir sér hvort hér geti verið um hagsmunaáresktra að ræða? 

Ísland er land tækifæranna - er það ekki? Allt svo frábært á Íslandi - eða hvað? 

Það kemur reyndar ekki fram hvort Kristinn mun áfram starfa sem stjórnarformaður Sævarhöfða sem á Ingvar Helgason.... en forstjóri í einu bílaumboði og stjórnarformaður og eigandi í fyrirtæki sem á samkeppnisaðila þess og enginn sér neitt að neinu? Væri það í lagi ef maðurinn gegndi stjórnarstörfum í þessum báðum fyrirtækjum á sama tíma og þau væru í samkeppni?  Annað væri ef þessir tveir samkeppnisaðilar ætluðu sér að renna saman í eitt, þá myndi málið horfa öðruvísi við - en spurningarnar ættu samt rétt á sér almennt, því getur það yfir höfuð staðist samkeppnislög ef svo væri raunin?

En það er ekki annað hægt en að skella aðeins uppúr yfir galdramönnum Íslands í dag, það gera allavega íbúar Norðurlandanna, sem hafa farið yfir krisskross eignarhald og stjórnarfyrirkomulagið heima fyrir ... en Íslendingar gera lítið annað en að yppa öxlum og segja:

"Svona er víst Ísland í dag".  Wizard

 

Vil taka það fram að í athugasemdum til mín hefur komið fram að þessi fyrirtæki tilheyra einmitt einum og sama aðilanum eða hafa semsagt runnið saman að einhverju leyti eins og ég var einmitt að velta fyrir mér hér að ofan en fannst á engan hátt koma fram í fréttaflutningi mbl.is og velti þá í framhaldinu fyrir mér hvers vegna þeir hafi ekki tekið það fram? Eins myndi ég samt sem áður spyrja mig að því hversu lengi maðurinn hefur gegnt stjórnarstörfum í þessum fyrirtækjum, hvort það hafi mögulega verið líka þannig áður en þau runnu inn undir sama eigandann og ef svo væri, hvort það myndi yfir höfuð standast samkeppnislög? Ekki það að mínar vangaveltur snúist eingöngu um þennan einstaka mann og hans störf, heldur eru vangaveltur mínar líka almenns eðlis um slík mál. 


mbl.is Kristinn Þór Geirsson nýr forstjóri B&L
Tilkynna um óviðeigandi tengingu við frétt

Gaman að sjá Draumalandið í bíó

Ég get allavega sagt fyrir sjálfa mig að ég hlakka til að sjá Draumalandið hans Andra Snæs í bíó. Ég sá leikritið uppsett í Hafnarfjarðarleikhúsi í fyrra og fannst það frábært, var í raun hissa á hvað var hægt að gera það flott og áhugavert. Myndin sem kemur í bíó verður þó ekkert í líkingu við leikritið sem byggir á bókinni, ég held allavega að þessi mynd muni sýna miklu meira og taka þessa stefnu stjórnvalda á víðan og gagnrýninn hátt í gegn. Stefnan sem slík og áframhald framkvæmda eru að sjálfsögðu fáránleg eins og staðan er í samfélagi okkar í dag. Það þarf í raun ekkert að deila um það og ætla ég ekki að gera það með þessari færslu.
mbl.is Draumalandið í bíó
Tilkynna um óviðeigandi tengingu við frétt

Flott framtak - höfum flugvöllinn í Keflavík

Þetta hefur mér alltaf fundist eina vitið varðandi flugsamgöngur í Reykjavík ef flugvöllurinn á að fara úr Vatnsmýrinni á næstu árum. Ef hægt er að koma upp einhvers konar hrað-raflest á milli Keflavíkur og Reykjavíkur og reynist hagkvæmt þegar litið er til lengri tíma þá finnst mér það skynsamlegasta lausnin. Hólmsheiðin er ekki líkleg til að reynast góður kostur að því er virðist á veðurathugunum - en við eigum flugvöll í Keflavík og ef hægt væri að komast hratt á milli þá gæti það verið betra en að byggja alveg nýjan flugvöll fyrir utan Reykjavíkurborg. Flott framtak að láta athuga þennan kost.
mbl.is Vilja láta skoða hagkvæmi lestarsamgangna
Tilkynna um óviðeigandi tengingu við frétt

« Fyrri síða | Næsta síða »

Höfundur

Andrea J. Ólafsdóttir
Andrea J. Ólafsdóttir

Klikkaðu á mig andreaolafs@gmail.com

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Mitt HTML

Innskráning

Ath. Vinsamlegast kveikið á Javascript til að hefja innskráningu.

Hafðu samband